"هبة " هو اسم أحاول أن أكونه لكل من أحب

السبت، 25 أغسطس، 2012

قلبى

قلبى ياغالى
يا غاضب ,وثاير
ومليان خساير
بلاش تبقى قاسى
بلاش تبقى جاحد
أنا وأنت واحد .
مفيش حد باعك
ولا حد خانك
عشان ياحبيبى
مفيش حد اصلا فى يوم اشتراك
......
يا قلبى يا باكى
ياصيدى وشباكى
وقارب نجاتى
مترجع معايا لبر الأمان .
مفيش كلمة جرحت
ولا دمعة هانت
ولا حد هانك
عشان من أساسه مفيش حد صانك
.....
ياقلبى يا طيب
يا ساكن قريب
على بعد خطوة من الصادقين
هنا مش مكانك
ماحدش بينكر عليك المحبة
ولا حد غشك ولا حد دانك
هنا مش مكانك
عشان هى طلعت من الأصل كدبة
مايقدر يعيشها غير الزائفين
............
ياقلبى
يانبع الحنان الجميل
يافارس أصيل
يخضر صحارى
يشق البحور
ويملى خطاوى طريقهم بنور
لا كنت استراحة مابين الفصول
ولا كنت لعبة لزوم التسالى لحد الوصول
ياريت يوم ميلادك ده كان الأفول
عشان ديه صحارى بتكره خضارها
بحورهم ماتلعن غير اللى حفرها
وضيك بيكشف صدا بيحاصرهم
ونوع الإزاز
هبة رفعت

وطن لله


 إهداء إلى صورة "مينا دانيال"التى كتبت القصيدة على ظهرها .


وحياة شبابى اللى فى شبابك غاب وتاه
وحياة "حبيبى "اللى روى رملك بدمعه
وحياة  جفاه ...
وحياة فراقه اللى احتمال يبقى عشانك .
وحياة لقاه .

لاحفر بأيدى الأرض أخرج نبضها
واقتل بايدى اللى بدا على ايده ظلمك وانتهى
وحياة منايا .......
اللى ما بتساعه القبور
لأفضل أعلم حتى طوب الأرض
ينتفض......
يصرخ...........
يثوووووووووووووووووووووور
وحياة سنين الصبر فيكى
لأرفع جبينى فوق جبين الشمس
وألعن هامان وجنوده
برده بأعلى حس
واصرخ فى عدلك م القضا
اللى اندفن واللى انقضى

واكتب كتاب
عن مسرحية ....

أول ما يتفتح الستار

لقيوا التحية عسكرية

مشوار مرار
بالون
وماسبيرو
ودخلية
ومجلس عار

ومفيش فرار
المسرحية مكملة
كل المداخل والمخارج مقفلة
هتموت هنا جوة الكراسى 
علشان ما صقفتش كويس
مين يبقى ريس؟؟؟؟!!!!!!

نقطة نظام
أنوارنا لسة ما أنطفتش
خلص الكلام .
بس الحكاية ما انتهتش

وحياة دمانا اللى نزف على ايد جبان
الحية خارجة م الميدان
وهتلقف السحرة اللى رفضوا يسجدوا
وهيرقدوا تحت الطوفان

المسرحية ...هى ...هى
والعصابة ....هى...هى

هم يعملوا مسرحية
بس أنا
أصنع حياةةةةةةةةةةةةة
أصنع وطن
لله

هبة رفعت
4/6/2012

ياماريونيت"ارتجالة مغاميرية"


يا ماريونت
خيوط كتير بتمرجحك
وتفرحك
لما تبان شكلك وجيه
وأما تبان المرجحة خطوات ثبات
وأما يحطوا فوق لسانك حرفهم
ويقولوا قال المعجزات
لأ والأكاده يصقفوا
يا ماريونت
حلمك تكون إنسان... حكيم
فيطلعوك دايمًا لئيم
ويدقوا بندول الخطر
الوقت شادد في الرحيل
فألحق بقى...
طب يحصل ايه!!
إذا كنت مش ممكن تشيب
ولا حتى ضهرك ينحني
لو هددوا بصوت الرصاص..
أو قدموا وزنك دهب
تفضل يا دوب
حبة خشب متدغدغة
متصلبين بخيوط قديمة
مرخرخة