"هبة " هو اسم أحاول أن أكونه لكل من أحب

الأربعاء، 1 مايو 2013

حدوتة ..



 لأن كلنا بنحب الحكايات وخاصة الحكايات اللى كانت بتتحكى لنا واحنا صغيرين :)
الحكاية ديه كان جدى الله يرحمه  بيحكيها لى ضمن حكايات كتير ..بقالى فترة باستجمعها وتقريبا ده الشكل الأقرب للحكاية اللى كان بيحكيها . اول مرة افتكرتها وحبيت احكيها لحد غالى عندى كانت بهتانة واجزاء كتير كانت ضايعة من ذاكرتى ..
أتمنى انها تعجبكم ...
وأتمنى من كل إنسان هيقرأها انه يدعى له بالرحمة ...



 
 "كان ياما كان ..فى سالف العصر والأوان ..ياسعد يا إكرام ..ولا يحلى الكلام إلا بذكر النبى عليه الصلاة والسلام ..
كان فيه 3 أصحاب ..الديب والثعلب وأبو الحصين ...وكانوا الثلاثة بيحبوا أكل البطيخ قوى وكانوا لما ينزلوا أى أرض بطيخ ممكن يخلصوا البطيخ كله ...وكان أبو الحصين


اكتر واحد فيهم يقدر يعرف البطيخة الحمرا من البطيخة القرعا ..فكان الديب والتعلب يعتمدوا عليه فإنه ينقى البطيخ ويقسمه عليهم وكان ابو الحصين بمجرد ما يخبط على البطيخة يقدر يعرف ان كانت حمرا ولا لأ 
فكان أبو الحصين يمسك البطيخة ويخبط عليها لما يعرف انها هتطلع حمرا يأخدها لنفسه وإللى يعرف إنها هتطلع قرعا يديها للديب والثعلب  وكان الثعلب مع كل بطيخة يقول له "اقسم بالحق ياأبو الحصين وإلا ..
 وحياة سرج ومرج لأخلى ريشك يملى الأرض ...."


وأبو الحصين عمال يقسم فى البطيخ 

والثعلب يقوله ..."قسم بالحق يا أبو الحصين وإلا 

وحياة  سرج ومرج لأخلى ريشك يملى الأرض "

لحد ما خلص أبو الحصين تقسيم البطيخ وأخد نصيبه ومشى وأقعد الديب والتعلب يأكلوا فى البطيخ وكل ما يفتحوا بطيخة يلاقوها قرعا ويفتحوا غيرها يلاقوها برده قرعا 
وبعدين قالوا بقى يروحوا يشوفوا أبو الحصين أخبار البطيخ بتاعه إيه ..
لما راحوا له لقوه بيأكل فى البطيخ وكل البطيخ بتاعه أحمر 
عرف التعلب ان أبو الحصين ضحك عليهم وأخد لنفسه كل البطيخ الأحمر واداهم الأقرع فقرر الثعلب بمكره انه يآخد حقه  منه 
وراح لأبو الحصين وقاله ان فيه صيدة  كبيرة قوى وان الديب راح علشان يجيبها وانه لازم يجى علشان ياخد حقه فى الوليمة ديه 
وفعلا مشى أبو الحصين مع الثعلب ولما وصلول لشجرة كبيرة قال الثعلب لأبو الحصين انه لازم يربط ديله فى الشجرة وإلا مش هيآخد حقه فى الوليمة الكبيرة 
ووافق أبو الحصين ان يتربط ديله فى الشجرة وكان الثعلب متفق مع الديب انه يروح يجيب الكلب ويقول له ان أبو الحصين هيآكل البطيخ كله وانه موجود تحت الشجرة وفعلا جه الكلب يجرى وأول ما سمع ابو الحصين صوت الكلب طلع يجرى ونسى ان ديله مربوط فاطقطع ديله ..
وبقى طول ماهو ماشى  الحيوانات تقوله يا ازعر وكل شوية يقولوا الأزعر راح الأزعر جه ..الأزعر راح ...الأزعر جه ...
لحد ما اتغاظ أبو الحصين وقررر انه ينتقم من كل ابو الحصينات اللى موجود فى البلدة ..
فجه فى يوم وزاع ان الكلاب كلها هتخرج للصيد برا البلدة وانه عامل حفلة كبيرة جدا وعازم فيها كل ابو الحصينات اللى موجودين وانه الحفلة ديه هتكون جنب مزرعة الفراخ وانه هيقسم على كل واحد نصيبه من الفراخ 
وفعلا صدق اصحابه انه هيعمل لهم حفله وراح كل واحد علشان يآخد نصيبه من الفراخ وهم داخلين بدأ يدى لكل واحد فيهم كيس وحبل ولما سالوه هو ليه بيديهم الكيس والحبل قال لهم علشان يأخدوا فيه الفراخ ويربطوها بالحبل واشطرت عليهم ان اللى يدخل يربطه من ديله بالحبل فى جزع الشجرة علشان يقسم الفراخ بالدور على كل واحد ..
ولما اتأكد أنه ربطهم كلهم قام رايح جرى على الكلاب الموجودة فى البلدة وقال لهم ان أبو الحصينات هيأكلوا الفراخ كلها وان الفراخ بتستنجد بيها ..
جت الكلاب تجرى علشان تلحق الفراخ وتنبح بصوت عالى وهم سمعوا الكلاب راحوا طايرين جرى وديولهم كلها اتقطعت ..

ولما بقوا يسألوهم مين اللى عمل فيكم كدة يقولوا الأزعر يدوروا يلاقوهم كلهم بقوا زعر :)
وتوتة توتة فرغت الحدوتة ..
حلوة ولا ملتوتة ..
 """""""""""""""""""""""""""

ملحوظة ..أبو الحصين هو حيوان أنا كنت فاكرة أنه خرافى واتضح لى انه حيوان حقيقى أكبر فى الحجم من القطة وشكله شكل الثعلب وبيتميز بالمهارة والمكر ويشبه الديب فى حبه لأكل الحيوانات الصغيرة زى الفراخ :)
 


"""""""""""""             

ليست هناك تعليقات: