"هبة " هو اسم أحاول أن أكونه لكل من أحب

الجمعة، 14 أكتوبر، 2011

يا حضرتك(1)


يا حضرتك ....
يا المتهم وانت البرئ..
النور خرج برا حدود المنقلة ..
والخط علشان يستقيم ..
ما بقاش يعوز المسطرة ...
فأسمحلى اعلق معطفك ..
واخرج من الحرم المقدس
وانا برده ما اقدرش اخسرك .....
انا قصدى آقول ....
كان اب وابنه كان صبى
لكن خرج عن ملته
عقله رفض الا طريقه وسكته
ولا كان جنون ولا كان غبى
كان دين حنيف صاحبه نبى ...
وما اقدرش آقول انى نبى
علشان ما فيش بعد كده
لكن بقول يمكن هدى
فتسبنى اخطى
ليه مفترض ان الشيطان هو اللى سابق خطوتى
يمكن رضا
يمكن سحابة خير تغير دنيتى
.................................
فاتت سنين وأنا كنت لابس معطفك
خايف افوته
لاحسن حدوده تكون يادوبك جنتى ..براها اتوه
والنار تكون خندق كبير ...
ما الحقش آعوذ منها ....
كان هو تعويذى الكتيير لكن ..
مقاسه كان كبير وطويل قوى ..
فبقيت آخاف لاحسن وقوعى يتربه
أو شئ فى لحظة يعيبه ..
.................................
ويوم الوقوع ماهو كان عليا
ولا شال ألم ولاشال وجع
زاد الفزع والكعبلة
ما هو كان طويل وكبيير قوى
وعشان كدة ما بقتش اخاف
لا من الوقوع ولا م الوجع
فاسمح لى اعلق معطفك
واخرج لاكبر مغزلة
علشان ما تأخد من سنين
عمرى اللى جاى كل الخيوط
وتفن هى ف غزلها

وتزينه من كلمتى ..............
ويكون على اسمى انا
ها اخرج لها ....
تكتب باقلامها الكتيير على
كل صفحة ف دنية القلب البرئ
ما النور جرئ ...عدا حدود المنقلة ..
والخط..باظ ع المسطرة ..
يا كل حضرة متهم
اسمح بخطوة ع الطريق
وبلاش تلون كل رسمة ...
وتعيد على كل النقط ..
خلّى الحياه ليها فينا قسمة ...
ما عشان يقوم حاضر ويعلى ..
لابد من حاضر سقط .......

 

ليست هناك تعليقات: